മലങ്കര സുറിയാനി കത്തോലിക്കാ സഭയുടെ ശതാബ്‌ദി ആഘോഷങ്ങളുടെ ഒരുക്കഭാഗമായി 2024 സെപ്റ്റംബർ 21 മുതൽ 2025 സെപ്റ്റംബർ 19 വരെ നടത്തപെടുന്ന 'എന്റെ വചനത്തിൽ വസിക്കുക' എന്ന വിഷയത്തിലധിഷ്ഠിതമായ വചനവർഷത്തിന്റെ ഇടവകതല ഉത്‌ഘാടനവും തിരുവചന പ്രതിഷ്ഠയും സെപ്റ്റംബർ 29 ഞായറാഴ്ച സഭയിലെ എല്ലാ ഇടവകളിലും വിശുദ്ധ കുർബാനയോടനുബന്ധിച്ച് ക്രമീകരിച്ചു. സഭാതല വചനവർഷ ഉത്‌ഘാടനം സഭയുടെ തലവനും പിതാവുമായ മോറാൻ മോർ ബസേലിയോസ് കർദ്ദിനാൾ ക്ളീമിസ് കാതോലിക്കാ ബാവ സഭയുടെ 94-മത് പുനരൈക്യ വേദിയായ  2024 സെപ്റ്റംബർ 21 ന് പാറശ്ശാല മാർ ഈവാനിയോസ് നഗറിൽ (വെങ്ങാനൂർ വി പി എസ് മലങ്കര എച്ച്. എസ്. എസ്) വച്ച് നിർവഹിച്ചിരുന്നു. ഇതേ തുടർന്നാണ് ഇടവകതല വചന വർഷാചരണത്തിന് തുടക്കമായത്. ഇതോടൊപ്പം സെപ്റ്റംബർ 29 ന് വൈകിട്ട് 7 മണിക്ക് എല്ലാ കുടുംബങ്ങളിലും സന്ധ്യാപ്രാർത്ഥനയോടുചേർന്ന് തിരുവചനപ്രതിഷ്ഠ നടത്തി കുടുംബതല വചനവർഷാചരണത്തിന് ആരംഭം കുറിച്ചു.  

മലങ്കര സുറിയാനി കത്തോലിക്കാ സഭയുടെ ശതാബ്‌ദി ആഘോഷങ്ങളുടെ ഭാഗമായുള്ള വചനവർഷ റിസോഴ്സ്‌ ടീം,  വൈദികർക്കുള്ള പരിശീലനം 2024 ജൂലൈ 30 , 31 ,ഓഗസ്റ്റ് 1 എന്നീ ദിവസങ്ങളിലായി മലങ്കര സുറിയാനി കത്തോലിക്കാ സഭയുടെ ആസ്ഥാന കാര്യാലയമായ പട്ടം കാതോലിക്കേറ്റ് സെന്ററിൽ  വചന വർഷത്തിന്റെ ചെയർമാൻ അഭിവന്ദ്യ എബ്രഹാം മാർ ജൂലിയോസ് മെത്രാപ്പോലീത്താ  ഉത്‌ഘാടനം ചെയ്തു.  കൂരിയ മെത്രാനും ശതാബ്‌ദി ആഘോഷങ്ങളുടെ കോഓർഡിനേറ്ററുമായ  അഭിവന്ദ്യ ആന്റണി മാർ സിൽവാനോസ് എപ്പിസ്കോപ്പ, ബൈബിൾ സിനഡൽ കമ്മീഷൻ സെക്രട്ടറി റവ. ഫാ. സിറിൽ ആനന്ദ് ഓ.ഐ.സി, ജൂബിലി കോഓർഡിനേറ്റർ ഫാ. സെബാസ്റ്റ്യൻ ഏടയത്ത് എന്നിവർ സന്നിഹിതരായിരുന്നു. ഓഗസ്റ്റ്1 ന് രാവിലെ അഭിവന്ദ്യ ആന്റണി മാർ സിൽവാനോസ് എപ്പിസ്കോപ്പയുടെ മുഖ്യകാർമികത്വത്തിൽ ധന്യൻ ആർച്ച്ബിഷപ്പ് മാർ ഇവാനിയോസ് പിതാവിന്റെ കബറിങ്കൽ വിശുദ്ധ കുർബാന അർപ്പിക്കുകയും തുടർന്ന് മലങ്കര സുറിയാനി കത്തോലിക്കാ സഭയുടെ തലവനും പിതാവുമായ മോറാൻ മോർ ബസേലിയോസ് കർദിനാൾ ക്ളീമിസ് കാതോലിക്കാ ബാവ വൈദികരെ അഭിസംബോധന ചെയ്ത് സംസാരിച്ചു.